რამხელა სივრცე სჭირდება დამტვირთველს მანევრირებისთვის?
არსებული საწყობისთვის ახალი დამტვირთველის შერჩევისას თუ ახალი საწყობის დაგეგმვისას, რამდენიმე მნიშვნელოვანი კრიტერიუმის გათვალისწინებაა საჭირო. ერთ-ერთი მთავარი პარამეტრი გასასვლელის მინიმალური სიგანეა. ტვირთის აღებისას ან განთავსებისას ტექნიკას შემოსაბრუნებლად გარკვეული თავისუფალი სივრცე ესაჭიროება.
რა განსაზღვრავს გასასვლელის სიგანეს?
დამტვირთველის გასასვლელის სიგანე (Ast) არის პირდაპირი გასასვლელის ის მინიმალური ზომა, სადაც კონკრეტული ტვირთით მოძრავ ტექნიკას 90 გრადუსით შემობრუნება შეუძლია.
პარამეტრს შემდეგი მონაცემები განსაზღვრავს:
- მობრუნების რადიუსი (Wa): მინიმალური რადიუსი, რომელიც დამტვირთველს წრიულად შემოსაბრუნებლად სჭირდება.
- ტვირთის ზომები: ტვირთის სიგანე (b12) და სიგრძე (l6) განსაზღვრავს სივრცეს, რომელიც ტექნიკას ტვირთის განსათავსებლად ესაჭიროება.
- ტვირთის მანძილი (x): ჰორიზონტალური მანძილი წინა ბორბლების ცენტრიდან ჩანგლის წინა ნაწილამდე.
- უსაფრთხოების დისტანცია (a): 200 200 მმ გასასვლელებში უსაფრთხო გადაადგილებისთვის.
- შიდა მობრუნების რადიუსი (b13): მანძილი დამტვირთველის ცენტრალური ღერძიდან მობრუნების წერტილამდე
გასასვლელის სიგანის გამოთვლა დამტვირთველების მიხედვით
ელექტრო ურიკები, ელექტრო სტაკერები, რიჩ დამტვირთველები და დაბალ სიმაღლეზე შეკვეთების ამგროვებლები.
Ast = Wa +√((l6 - x)² + (b12/2)²) + a
სამბორბლიანი კონტრბალანსური დამტვირთველები, ოთხბორბლიანი კონტრბალანსური დამტვირთველები და მაღალ სიმაღლეზე შეკვეთების ამგროვებლები.
Ast = Wa +√((l6 + x)² + (b12/2)²) + a
ოთხბორბლიანი კონტრბალანსური დამტვირთველები
Ast = Wa + x + l6 + a
VNA დამტვირთველების შემთხვევაში გამოთვლა შედარებით კომპლექსურია. საჭიროების შემთხვევაში, Toyota-ს სპეციალისტი დაგეხმარებათ.
როგორ შევარჩიოთ სწორი დამტვირთველი არსებული გასასვლელის სიგანისთვის?
გსურთ ახალი ტექნიკის შეძენა თუ დამატებითი დამტვირთველის იჯარით აღება? რამდენიმე რჩევა იმისთვის, რომ შერჩეული ტექნიკა თქვენს სივრცეს იდეალურად მოერგოს:
- გაზომეთ თაროებს შორის მანძილი, რათა დარწმუნდეთ, რომ დამტვირთველი ამ ზონაში თავისუფლად შემოტრიალდება. ყურადღება მიაქციეთ თაროების დამცავებს, პალეტის ნაწილებს, ქვეითთა ბილიკებსა და სხვა დეტალებს.
- სტანდარტული ტვირთის ზომების მქონე დამტვირთველების გასასვლელის სიგანე ტექნიკურ მონაცემთა ფურცელშია მოცემული. არასტანდარტული ტვირთისთვის კი საჭირო სიგანის გამოთვლაა აუცილებელი.
- თუ სხვადასხვა ტიპის დამტვირთველებს იყენებთ, შეამოწმეთ გასასვლელის სიგანის მოთხოვნები თითოეული მათგანისთვის. მაგალითად, ოთხბორბლიან მოდელს შემოსაბრუნებლად მეტი სივრცე სჭირდება, ვიდრე სამბორბლიანს.
- ბრენდის შეცვლისას კიდევ ერთხელ გადაამოწმეთ ზომები, რადგან მობრუნების რადიუსებს შორის შესაძლოა განსხვავება იყოს.
როგორ ზრდის შენახვის მოცულობას ვიწრო გასასვლელები?
საწყობის სივრცე
გასასვლელის სიგანე და დამტვირთველის არჩევანი ერთმანეთზეა დამოკიდებული. რაც უფრო დიდია სივრცე, მით მეტია სხვადასხვა ტიპის ტექნიკის გამოყენების შესაძლებლობა. შეზღუდულ სივრცეში კი ტექნიკის მოდელის შერჩევას განსაკუთრებული სიზუსტე სჭირდება.
შენახვის ტევადობა
სწორი ზომების მქონე დამტვირთველის შერჩევა აისახება საწყობის ტევადობაზე. ვიწრო გასასვლელების პირობებში მეტი თაროს განთავსებაა შესაძლებელი, რაც სასაწყობე სივრცეს ზრდის.
სწორად შერჩეული დამტვირთველი
იმ შემთხვევებში, სადაც სივრცე შეზღუდულია და დიდი ამწეობის სიმაღლეა საჭირო, მოსახერხებელია რიჩ დამტვირთველები, სამბორბლიანი ელექტრო კონტრბალანსური დამტვირთველები ან VNA ტექნიკა.
შესაფერისი მოდელის პოვნა მხოლოდ სივრცის მოთხოვნებს არ უკავშირდება და ის თქვენს საოპერაციო ამოცანებსა და ოპერატორის საჭიროებებსაც უნდა ერგებოდეს.
შესაძლოა დაგაინტერესოთ
ტვირთამწეობის კლებადობის გზამკვლევი
გზამკვლევში განმარტებულია, როგორ იცვლება დამტვირთველის ტვირთამწეობა აწევის სიმაღლის, დატვირთვის ცენტრისა და დამატებითი აღჭურვილობის მიხედვით.
ელექტრო დამტვირთველების გზამკვლევი
მიჰყევით ამ ეტაპობრივ გზამკვლევს თქვენი ბიზნესისთვის საუკეთესო ტექნიკის შესარჩევად. მასში სასარგებლო ინფორმაციასა და რჩევებს იპოვით.
ანძის გზამკვლევი
გზამკვლევში განხილულია ანძის ძირითადი ტიპები, მათი მახასიათებლები და გამოყენების პირობები. ინფორმაცია კონკრეტული სამუშაო გარემოსთვის შესაფერისი ვარიანტის შერჩევას ამარტივებს.
გაინტერესებთ დამატებითი ინფორმაცია Li-ion ბატარეებზე?
იხილეთ ჩვენი ხშირად დასმული შეკითხვების (FAQ) გვერდი, სადაც დეტალურად ვპასუხობთ ყველა კითხვას ლითიუმ-იონის ტექნოლოგიის გარშემო.