კორპორაციული მართვის ჩარჩო
გამართული კორპორაციული მართვა მდგრადი განვითარებისა და თანამშრომლების, მომხმარებლებისა თუ სხვა დაინტერესებული მხარეების ნდობის განმტკიცების საფუძველია. საქმიანობისა და რესურსების მართვა მიმდინარეობს ეფექტური, ეთიკური და გამჭვირვალე პრინციპებით, განვითარების დასახული მიზნების მისაღწევად. ეს პროცესი მოიცავს ისეთი გადაწყვეტილებების მიღებასა და იმპლემენტაციას, რომლებიც მხარს უჭერს ყველა პარტნიორსა და დაინტერესებულ მხარეს.
ბიზნესკულტურა
საუკუნის წინ საკიჩი ტოიოდამ ჩაუყარა საფუძველი კომპანიას, რომელიც შემდგომში Toyota Industries Corporation-ად ჩამოყალიბდა. მისი საქმიანობა ეფუძნებოდა პრინციპებს, რომლებიც დღესაც ინარჩუნებს აქტუალობას. „ტოიოდას პრინციპების“ (Toyoda Precepts) სახელით ცნობილი ეს ღირებულებები აერთიანებს ინოვაციებისადმი სწრაფვას, კეთილსინდისიერებასა და ადამიანების პატივისცემას.
საქმიანი ეტიკეტი და ქცევის სტანდარტები
Toyota Material Handling Europe-ში ეს მემკვიდრეობა ყოველდღიური საქმიანობის განუყოფელი ნაწილია. „ადამიანური რესურსების ფილოსოფია“ (People Philosophy) ასახავს კომპანიასა და თანამშრომლებს შორის ურთიერთპასუხისმგებლობას. „ქცევის კოდექსი“ კი „ტოიოდას პრინციპებს“ პრაქტიკულ სახელმძღვანელოდ გარდაქმნის და ნებისმიერ დონეზე მიღებული გადაწყვეტილებების ეთიკურ სტანდარტებთან შესაბამისობას განსაზღვრავს.
Toyota Material Handling Europe-ის შესაბამისობის სისტემა ეყრდნობა Toyota Industries Europe AB-ის ჯგუფურ პოლიტიკას ბიზნესეთიკის, კორპორაციული კულტურის, ანტიკორუფციული სტანდარტებისა და მხილებელთა დაცვის შესახებ. ეს მიდგომა ამყარებს ერთიან სტანდარტებს ევროპულ წარმომადგენლობებში. პოლიტიკა ასახავს მისწრაფებას გამჭვირვალობის, ანგარიშვალდებულებისა და მუდმივი გაუმჯობესებისკენ.
შესაბამისობის სისტემა
კორპორაციული მართვის სტრუქტურა ეფუძნება ამ პრინციპებს. Toyota Material Handling Europe-ის შესაბამისობის კომიტეტი, ხელმძღვანელ პირებთან ერთად, აფასებს რისკებს როგორც სტრატეგიულ, ისე საოპერაციო დონეზე. ადგილობრივი შესაბამისობის ოფიცრები ამ სტანდარტებს ყოველდღიურ პრაქტიკაში ნერგავენ, რაც ზრდის პასუხისმგებლობას თითოეულ ობიექტზე.
საერთაშორისო ვაჭრობის წესებთან შესაბამისობა ამ მიდგომის მნიშვნელოვანი ნაწილია. ევროკავშირის სანქციებთან ადაპტირებული პოლიტიკა ქმნის გლობალურად თანმიმდევრულ და ადგილობრივ გარემოზე მორგებულ პროცესებს. შემოწმების სისტემები ინარჩუნებს საოპერაციო პროცესების სტაბილურობასა და სანდოობას.
ქცევის კოდექსი
„ქცევის კოდექსი“ განსაზღვრავს მოთხოვნებს ადამიანის უფლებების, ეთიკური ქცევის, ანტიკორუფციული ზომებისა და კომპანიის აქტივების პასუხისმგებლიანი გამოყენების შესახებ. ყველა თანამშრომელი ორ წელიწადში ერთხელ გადის სავალდებულო სწავლებას მრავალენოვანი ელექტრონული პლატფორმითა და ადგილობრივი ოფიცრების ჩართულობით.
ახალი თანამშრომლები დამატებით ეცნობიან Toyota-ს ისტორიასა და „ტოიოდას პრინციპებს“. ანგარიშვალდებულების დასაცავად მოქმედებს 24/7 ცხელი ხაზი და დარღვევების გამოძიების პოლიტიკა, რომელიც იცავს მხილებელთა უსაფრთხოებას.
სამომავლო გეგმები
პრიორიტეტად რჩება ისეთი სფეროები, როგორებიცაა ანტიკორუფციული საქმიანობა, ESG (გარემოსდაცვითი, სოციალური და კორპორაციული მართვის) სტანდარტები და შესყიდვები. რისკის შემცველი პოზიციების იდენტიფიცირებით, მიზნობრივი ტრენინგებითა და ევროკავშირის ESG საკანონმდებლო ინსტრუმენტების გაფართოებით, იქმნება მყარი საფუძველი საკანონმდებლო მოთხოვნებთან შესაბამისობისთვის.
შესყიდვების პოლიტიკა განსაზღვრავს მიწოდების ჯაჭვში კეთილსინდისიერების იმავე სტანდარტს, რასაც კომპანია საკუთარ თავს უწესებს.
