8 რჩევა დამტვირთველის შესარჩევად

რა ტიპის ტვირთთან გიწევთ მუშაობა?

პირველ რიგში, შეაფასეთ ტვირთის სპეციფიკა. აუცილებლად გააანალიზეთ შემდეგი ფაქტორები:

1. ტვირთი: რა ტიპის მასალასთან გიწევთ მუშაობა? მისი წონა და ზომა უმნიშვნელოვანესი ფაქტორებია, რომლებიც ტექნიკის კლასს განსაზღვრავს. მხოლოდ ერთი ზომის პალეტებს იყენებთ თუ განსხვავებული გაბარიტები მეტ მოქნილობას მოითხოვს? ტვირთი მცირე ზომის ცალკეული ნივთებისგან შედგება თუ დიდი მოცულობის პალეტებისგან?
2. შენახვის წესი: როგორ ანაწილებთ საქონელს საწყობში? მაგალითად, FIFO პროცესები სრულიად განსხვავებულ მიდგომას მოითხოვს, ვიდრე LIFO. 
3. ვერტიკალური განთავსება: რამდენად იძლევა საქონლის სპეციფიკა პალეტების ერთმანეთზე დალაგების საშუალებას? დაგჭირდებათ მათი სასაწყობე თაროებზე განთავსება თუ მხოლოდ ჰორიზონტალური გადაადგილება გესაჭიროებათ?
4. თაროები: როგორია სასაწყობე თაროების ზომები? გაზომეთ არა მხოლოდ სიმაღლე, არამედ თაროების სიღრმეც. ასე ზუსტად გეცოდინებათ, რა სიმაღლეზე უნდა წვდებოდეს დამტვირთველის ანძა ყველაზე მაღალ იარუსთან სამუშაოდ.

როგორია საწყობის გეგმარება?

სამუშაოები შენობის შიგნით სრულდება თუ გარეთ? გარე სივრცეში სამუშაოდ ტექნიკა მომზადებული უნდა იყოს ნალექისა და სხვადასხვა კლიმატური პირობებისთვის. ახლა დეტალურად განვიხილოთ საწყობის გეგმარება:

ჭერი: რა სიმაღლეზეა შესაძლებელი ანძის გაშლა? ყურადღება მიაქციეთ არა მხოლოდ ჭერის სიმაღლეს, არამედ შედარებით დაბლა განთავსებულ კომუნიკაციებსაც. ყოველთვის გაზომეთ ყველაზე დაბალი წერტილი და გაითვალისწინეთ იგი ტექნიკის შერჩევისას.

კარები და გასასვლელები: რა სიმაღლისა და სიგანისაა ისინი? გაზომეთ ორივე პარამეტრი, რათა დარწმუნდეთ, რომ შერჩეული დამტვირთველი თავისუფლად გაივლის შასისა თუ საწყობის ინფრასტრუქტურის დაზიანების გარეშე.

დერეფნები: გაზომეთ ყველა გასასვლელის სიგანე და სიგრძე. ასევე შეამოწმეთ იატაკის საფარი და მისი მდგომარეობა. რა მასალისგან არის დამზადებული და გაუძლებს თუ არა მძიმე ტექნიკის წნევას? სწორია ზედაპირი თუ აქვს გარკვეული დახრილობა?

მანძილი: გიწევთ თუ არა ტვირთის დიდ მანძილზე ტრანსპორტირება? თუ ტექნიკა მხოლოდ მარტივი, მოკლე გადაადგილებებისთვის გჭირდებათ? გაითვალისწინეთ მოძრაობის სიხშირე და მანძილი.