კომპანიისთვის თანამშრომლებისა და მის საქმიანობაში ჩართული ყველა ადამიანის ჯანმრთელობა და კეთილდღეობა უმთავრესი პრიორიტეტია. სწორედ ამიტომ, დამტვირთველების, მომსახურებისა და სამუშაო პროცესების გაუმჯობესებისას მთავარი ყურადღება რისკების შემცირებასა და დაცული სამუშაო გარემოს შექმნას ეთმობა.
Toyota Industries Corporation შრომის უსაფრთხოებაზე ახალი ქარხნების დაგეგმვის, საოფისე სივრცეების მოწყობისა და დამტვირთველების ფუნქციების შემუშავების პირველივე ეტაპიდან ზრუნავს. რისკების დროული შეფასება კომპანიას ეხმარება, შესაძლო საფრთხეები წინასწარ გამოავლინოს და მათი თავიდან აცილების გზები იპოვოს.
ეს მიდგომა საქმიანობის ყველა მიმართულებას მოიცავს და ეფუძნება Toyota Industries Corporation-ის ინციდენტების თავიდან აცილების ხედვას, Zero Accidents Vision-სა და ბრედლის უსაფრთხოების მოდელს, Bradley Safety Model-ს. მოდელის მთავარი მიმართულებებია ლიდერობა, აღჭურვილობა, სამუშაო პროცესები და ადამიანები.
“Toyota Industries Group-ის თითოეული წევრი კომპანიის ღირებულებებზე დაყრდნობით მონაწილეობს ისეთი სამუშაო კულტურის ჩამოყალიბებაში, სადაც ერთმანეთის პატივისცემა და გარემოზე ზრუნვა ყოველდღიური საქმიანობის ნაწილია. ასეთი დამოკიდებულება თანამშრომლებს ეხმარება, საქმეს პასუხისმგებლობით, სიამაყითა და კმაყოფილებით მიუდგნენ.”
სამუშაო ადგილზე მთავარი ამოცანა პერსონალისა და საწარმოო პროცესებში ჩართული ადამიანების დაცვაა. შესაძლო საფრთხეების დროული გამოვლენა ამცირებს ტრავმების, პროფესიული დაავადებებისა და სხვა ინციდენტების რისკს. დაცულ გარემოში სამუშაო პროცესიც უფრო გამართულად მიმდინარეობს. შედეგად, იზრდება პროდუქტიულობა და მცირდება ზედმეტი ხარჯები.
შრომის უსაფრთხოება მუდმივ ყურადღებას მოითხოვს. სამუშაო პირობები და შესაძლო რისკები დროთა განმავლობაში იცვლება, ამიტომ არსებული წესები და პროცედურები რეგულარულად უნდა გადაიხედოს და ახალ გარემოებებს მოერგოს.
კომპანია ბრედლის უსაფრთხოების მოდელს, Bradley Safety Model-ს, მიჰყვება. შრომის დაცვის სპეციალისტები ამ მოდელს სამუშაო გარემოს შესაფასებლად და ინციდენტების პრევენციის გზების დასაგეგმად იყენებენ. ყურადღება ოთხ ძირითად მიმართულებას ეთმობა: ლიდერობას, აღჭურვილობას, სამუშაო პროცესებსა და ადამიანებს. მათი ერთობლივი შეფასება აჩვენებს, სად არის საჭირო ცვლილება და რა ნაბიჯები უნდა გადაიდგას რისკების შესამცირებლად.
კომპანია 2010 წლიდან ევროპის შრომის უსაფრთხოებისა და ჯანმრთელობის სააგენტოს, EU OSHA-ს, პარტნიორია, 2014 წლიდან კი კამპანიის მმართველ ჯგუფშიც მონაწილეობს. თანამშრომლობის ფარგლებში ევროპელი პარტნიორები ერთმანეთს გამოცდილებასა და პრაქტიკულ ცოდნას უზიარებენ. ამასთან, ისინი აანალიზებენ სამუშაო ადგილზე მომხდარი ინციდენტების მიზეზებს, რათა მსგავსი შემთხვევების თავიდან აცილების გზები განსაზღვრონ.
ახალი თანამშრომლები მუშაობის დაწყებამდე ჯანმრთელობის, უსაფრთხოებისა და კეთილდღეობის ელექტრონულ კურსს გადიან. შემდეგ ისინი ადგილობრივ ტრენინგებში მონაწილეობენ, სადაც სამუშაო გარემოსთან დაკავშირებულ წესებსა და შესაძლო რისკებს ეცნობიან. საოფისე სივრცეები ერგონომიული პრინციპების გათვალისწინებით არის მოწყობილი, თანამშრომლებს კი საჭირო ტექნიკური აღჭურვილობა აქვთ. კომპანია ასევე იცავს შესვენებისა და სამუშაო საათების დასრულების შემდეგ დასვენების უფლებას, რომელიც ცნობილია როგორც Right to disconnect.
მენეჯერებს მნიშვნელოვანი როლი აკისრიათ უსაფრთხო სამუშაო პირობების ჩამოყალიბებაში. ისინი გეგმავენ და მართავენ ყოველდღიურ საქმიანობას, ანაწილებენ პასუხისმგებლობებს და აკვირდებიან პროცესების მიმდინარეობას. მათ მიერ მიღებული გადაწყვეტილებები უშუალოდ აისახება თანამშრომლების სამუშაო პირობებსა და შესაძლო რისკებზე.
კომპანიის მენეჯერები პირადი მაგალითით ამკვიდრებენ უსაფრთხო მუშაობის წესებს. ამავე დროს, ისინი ეცნობიან საერთაშორისო გამოცდილებასა და კანონმდებლობაში შეტანილ ცვლილებებს, რათა კომპანიაში არსებული წესები დროულად განაახლონ.
ქარხნის თითოეული თანამშრომელი მუშაობას უსაფრთხოების ინსტრუქტაჟის გავლის შემდეგ იწყებს. სასწავლო სივრცეებში, Learning Dojos, პერსონალი პრაქტიკული სავარჯიშოებით ეცნობა სამუშაო წესებს და ივითარებს პროფესიულ უნარებს. სწავლება მოიცავს Lean, Agile, DevOps და პროდუქტის განვითარების მიმართულებებს, რაც თანამშრომლებს სამუშაო პროცესების უკეთ გააზრებასა და შეცდომების შემცირებაში ეხმარება.
გაყიდვების შემდგომი შეფასებისა და სერტიფიცირების პროგრამის, ASEC-ის, ფარგლებში სერვისის გუნდები რეგულარულ შემოწმებას გადიან. შეფასებისას მოწმდება სამუშაო აღჭურვილობა, სახიფათო ნივთიერებებსა და ნარჩენებთან მუშაობის ცოდნა, ასევე უსაფრთხოების წესების დაცვა. ასეთი შემოწმება ამცირებს საფრთხეს როგორც ტექნიკოსებისთვის, ისე მათ გარშემო მყოფი ადამიანებისთვის.
ISO 45001 სერტიფიკატი სავალდებულოა საწარმოო ობიექტებისთვის, სხვა წარმომადგენლობებისთვის კი მისი მიღება რეკომენდებულია. მარკეტინგისა და გაყიდვების მიმართულებით მომუშავე კომპანიებს დაგეგმილი აქვთ, სერტიფიცირების პროცესი 2030 წლისთვის დაასრულონ.
თანამშრომლების ჯანმრთელობასა და უსაფრთხოებაზე ზრუნვა კომპანიის საქმიანობის ერთ-ერთი მთავარი მიმართულებაა. ტექნიკის, მომსახურებისა და სამუშაო პროცესების რეგულარული განახლებისას განსაკუთრებული ყურადღება ექცევა საწყობსა და საწარმოში შესაძლო საფრთხეების შემცირებას.
თანამედროვე ტექნოლოგიები რისკების დროულად გამოვლენასა და ინციდენტების თავიდან აცილებაში მნიშვნელოვან როლს ასრულებს. უსაფრთხოების ზომები მხოლოდ სტანდარტული მოთხოვნების დაცვით არ შემოიფარგლება. კომპანია წინასწარ აფასებს შესაძლო საფრთხეებს და შესაბამის ნაბიჯებს მანამდე გეგმავს, სანამ ისინი სამუშაო პროცესზე აისახება.
პერსონალის რეგულარული გადამზადება, უსაფრთხოების წესების განახლება და სამუშაო პროცესების რეალურ დროში მონიტორინგი ამცირებს შეცდომებისა და შეფერხებების რისკს. შედეგად, საწარმოო და ლოგისტიკური საქმიანობა უფრო სტაბილურად მიმდინარეობს, ხოლო თანამშრომლები დაცულ გარემოში მუშაობენ. უსაფრთხოებისადმი ასეთი დამოკიდებულება ბიზნესის გრძელვადიანი წარმატების საფუძველია.
როგორ იქმნება უსაფრთხო ტექნიკა?
პროექტირება და განვითარება
წარმოება და შემოწმება
Toyota-ს LEAN წარმოების მრავალწლიანი გამოცდილება და Toyota-ს საწარმოო სისტემის, TPS-ის, მოთხოვნები წარმოების თითოეულ ეტაპზეა გათვალისწინებული. გამოყენებამდე ყველა დამტვირთველი დეტალურ შემოწმებასა და ტესტირებას გადის. შედეგად, შესაძლო ხარვეზები დროულად ვლინდება და მომხმარებელს ხარისხისა და უსაფრთხოების მოთხოვნებთან შესაბამისი ტექნიკა გადაეცემა.
ინდუსტრიული ტექნიკის უსაფრთხოდ ოპერირება
სპეციალისტები მომხმარებლებს სამუშაო პირობების შესაბამისი მოდელის შერჩევაში ეხმარებიან. ტექნიკის უსაფრთხო და გამართული მუშაობისთვის ხელმისაწვდომია პროფესიონალური ტექნიკური მომსახურებაც, რომელიც შესაძლო ხარვეზების დროულად აღმოჩენასა და შეფერხებების შემცირებაზეა ორიენტირებული.
ოპერატორების მომზადების პროგრამა
ოპერატორების სათანადო მომზადება ამცირებს ტექნიკის მართვასთან დაკავშირებულ რისკებს. სტატისტიკის მიხედვით, დამტვირთველებთან დაკავშირებული ინციდენტების 25% არასაკმარისი კვალიფიკაციითაა გამოწვეული.
ოპერატორის ტრენინგი განსაკუთრებით საჭიროა ახალი თანამშრომლის მიღებისას, მოვალეობების შეცვლისას ან სამუშაო პროცესში მნიშვნელოვანი ცვლილების შეტანის შემდეგ. განახლებული ცოდნა ოპერატორებს ტექნიკის სწორად მართვასა და საფრთხეებზე დროულ რეაგირებაში ეხმარება. საბაზისო კურსი შეესაბამება კანონით დადგენილ მოთხოვნებს, რომელთა მიხედვითაც დამტვირთველის მძღოლს შესაბამისი კვალიფიკაცია უნდა ჰქონდეს.
ავტომატიზებული ტექნიკის ფართო არჩევანი
ოპერატორის გარეშე მომუშავე სისტემები ტვირთის დამუშავებისას სიზუსტეს ზრდის და ინციდენტების რისკს ამცირებს. სენსორებით აღჭურვილი ავტომატიზებული ტექნიკა, მათ შორის Autopilot მოდელები, გზაზე არსებულ დაბრკოლებებს ამოიცნობს და შეჯახების საფრთხისას ავტომატურად ჩერდება.
ეს მოდელები უსაფრთხოდ მუშაობს როგორც პერსონალის, ისე მძღოლის მიერ მართული დამტვირთველების გვერდით. მათი გამოყენება შესაძლებელია სხვადასხვა ტიპის სამუშაო გარემოში. ავტომატიზაცია აჩქარებს ტვირთების გადაადგილებას, ამცირებს ენერგიის ხარჯს და ტვირთის დაზიანებით გამოწვეულ დანაკარგებს.
გაყიდვის შემდგომი მომსახურება
ტექნიკის შეძენის შემდეგ მომხმარებლები სარგებლობენ სასწავლო მასალებით, ტექნიკური მხარდაჭერით, განახლების პაკეტებითა და გეგმური მომსახურებით. რეგულარული შემოწმება შესაძლო ხარვეზებს დროულად ავლენს, რის შედეგადაც მცირდება გაუთვალისწინებელი შეფერხებების რისკი.
უსაფრთხოების ციფრული სისტემები
I_Site ტექნიკის მართვის სისტემა აკონტროლებს, ვის აქვს დამტვირთველის გამოყენების უფლება და აგროვებს ინფორმაციას მისი მუშაობის შესახებ. მიღებული მონაცემების ანალიზით შესაძლებელია რისკების დროულად აღმოჩენა და სამუშაო პროცესის უკეთ დაგეგმვა.
სისტემა მოიცავს მუშაობის დაწყებამდე შესასრულებელ შემოწმებას, Pre op check-ს, და მძღოლების მართვის ფუნქციას. მათი დახმარებით ტექნიკის გამოყენებამდე მოწმდება მისი მდგომარეობა და დასტურდება, რომ საჭესთან შესაბამისი კვალიფიკაციის მქონე პირი იმყოფება.