ეტაპობრივი ავტომატიზაცია

შემომავალი ტვირთის დამუშავება

შემომავალი ტვირთი, როგორც წესი, იატაკზე მონიშნულ სპეციალურ ზოლებში თავსდება, რომლებსაც ღრმა შტაბელებსაც უწოდებენ. ამ ზონებს სატვირთოს მძღოლები ან მიღების განყოფილების თანამშრომლები ავსებენ. შემდეგ ტვირთს AGV, Toyota Autopilot იღებს და ამ ზონიდან თაროებზე ან იატაკზე მოწყობილ შესანახ სივრცეში გადააქვს. 

დასაწყობების პროცესში ზოგჯერ რამდენიმე სახის ტექნიკა მონაწილეობს, რადგან თითოეულ მათგანს განსხვავებული დანიშნულება აქვს. მაგალითად, ტვირთი დაბალი აწევის ავტომატიზებულ ურიკას გადააქვს, ხოლო თაროზე რიჩ დამტვირთველი ათავსებს. ამგვარი განაწილებით, თითოეულ ოპერაციას შესაბამისი ტიპის ტექნიკა ასრულებს, რის შედეგადაც სამუშაო პროცესი უფრო სწრაფად და გამართულად მიმდინარეობს. 

სურათზე ნაჩვენებია ტვირთის აღების ადგილი, რომელიც შეიძლება იყოს იატაკზე მოწყობილი შესანახი ზონა ან კონვეიერი. 

როგორ იმართება ტვირთის გადაადგილება?

ტრანსპორტირების დავალებას ხშირად მიღების ზონის მენეჯერი გასცემს T ONE სისტემასთან დაკავშირებული პლანშეტით ან სპეციალური ღილაკით. Autopilot ტვირთს იღებს, მასზე დამონტაჟებული სკანერი კი საიდენტიფიკაციო მონაცემებს ამოწმებს. ამის შემდეგ T ONE დანიშნულების ადგილის შესახებ ინფორმაციას საწყობის მართვის სისტემიდან, WMS სისტემიდან იღებს.

თუ ობიექტზე WMS არ გამოიყენება, ტვირთის განთავსების ადგილს T ONE საკუთარი ფუნქციით განსაზღვრავს. სისტემა დასკანერებულ მონაცემებს წინასწარ გაწერილ პირობებს ადარებს და შესაბამის ადგილს ამის მიხედვით არჩევს. დანიშნულების წერტილი ფიქსირებული არ არის და დღის განმავლობაში შეიძლება შეიცვალოს. მაგალითად, დილით ტვირთი ერთ ზონაში განთავსდეს, შუადღეს კი სხვაგან. ამგვარად, ტვირთის მოძრაობა საწყობის სამუშაო წესებსა და მიმდინარე პირობებს მიჰყვება. 

რა არის საჭირო ტვირთის შეუფერხებლად დასამუშავებლად

იმისთვის, რომ Autopilot-მა ტვირთი მიღების ზონიდან შეფერხების გარეშე აიღოს, პალეტები სწორად უნდა იყოს განთავსებული. ტვირთის გადატანამდე სასურველია შემოწმდეს როგორც პალეტის მდებარეობა, ისე ტვირთის მდგომარეობა. ამ გზით დაზიანება ან არასწორი განლაგება ტექნიკის ამოქმედებამდე გამოვლინდება.

თანამშრომლებმა და სატვირთოს მძღოლებმა ასევე უნდა იცოდნენ, როგორ განათავსონ პალეტები ავტომატიზებული ტექნიკისთვის განკუთვნილ ზონაში. მკაფიო ინსტრუქციები და შესაბამისი სწავლება ამცირებს შეფერხებისა და დაზიანების რისკს, რის შედეგადაც პროცესი უფრო თანმიმდევრულად მიმდინარეობს.

სურათზე ნაჩვენებია ტვირთის განთავსების ადგილი. ეს შეიძლება იყოს იატაკზე მოწყობილი შესანახი ზონა, ჩვეულებრივი ან გრავიტაციული თაროები, ასევე RS150 შატლის სისტემა RAE რიჩ დამტვირთველთან ერთად.

ვრცლად პროექტების მართვის შესახებ >>

მარაგის ავტომატიზირებული შევსება

საწარმოებში ნაწილების მარაგს განსაკუთრებით ხშირად ავსებენ წარმოების ხაზებთან, შეკრებისა და კომპლექტაციის ზონებში. Toyota Autopilot პალეტებს სასაწყობე ზონაში მოწყობილი იატაკის ბუფერებიდან ან თაროებიდან იღებს და საწარმოო ხაზთან ან შეკრების ადგილზე მიაქვს. 

ერთი პალეტის გადასატანად ავტომატიზებული დამტვირთველი გამოიყენება, ხოლო რამდენიმე პალეტს ავტომატიზებული გამწევი დამტვირთველი ერთდროულად გადაადგილებს. დატვირთულ მონაკვეთებში, მათ შორის ასაწყობ ხაზებთან, უჩანგლო სისტემებიც გამოიყენება. უჩანგლო სისტემები ტვირთს შეუფერხებლად გადაადგილებს და განსაკუთრებით ეფექტიანია იმ უბნებზე, სადაც თანამშრომლები და ტექნიკა ერთმანეთის გვერდით მუშაობენ. 

სურათზე ნაჩვენებია ტვირთის აღების ადგილი. ეს შეიძლება იყოს იატაკზე მოწყობილი ბუფერი, ჩვეულებრივი ან გრავიტაციული თაროები, ასევე RS150 შატლის სისტემა RAE რიჩ დამტვირთველთან ერთად. 

როგორ იმართება მარაგის შევსების პროცესი

მარაგის შევსებისას T ONE ორ სატრანსპორტო დავალებას ქმნის. სისტემა ჯერ ცარიელ პალეტს იღებს და გააქვს, შემდეგ კი მის ადგილას სავსე პალეტს ათავსებს. ამ გზით ერთდროულად იმართება ტვირთის გადატანა დანიშნულების ადგილამდე და ცარიელი პალეტების უკან დაბრუნება. 

ავტომატიზებულ გამწევ დამტვირთველს წრიულ მარშრუტზე მოძრაობაც შეუძლია. ამ რეჟიმით ნაწილები რამდენიმე სამუშაო ადგილს თანმიმდევრულად მიეწოდება. 

დავალება შეიძლება გაიცეს დანადგარის პროგრამირებადი კონტროლერიდან, PLC სისტემიდან ან საწყობის მართვის სისტემიდან, WMS სისტემიდან. საჭიროების შემთხვევაში, დავალებას ოპერატორიც გასცემს პლანშეტით ან სისტემასთან დაკავშირებული ღილაკით.

სურათზე ნაჩვენებია ტვირთის განთავსების ადგილი, როგორიცაა საწარმოო სამუშაო სადგური ან თარო.

ვრცლად ავტომატიზებული გამწევი სისტემების შესახებ >>

დროებითი ბუფერული ზონების მართვა

წარმოების ტემპი ყოველთვის თანაბარი არ არის. ზოგჯერ ერთი ეტაპი უფრო სწრაფად სრულდება, ვიდრე მომდევნო, რის გამოც ნახევარფაბრიკატებისთვის დროებითი შესანახი სივრცე ხდება საჭირო.

T ONE აფიქსირებს, როდის უნდა განთავსდეს ტვირთი დროებით ბუფერულ ზონაში და შესაბამის ადგილს არჩევს. Autopilot ტვირთს ამ ზონაში ათავსებს, ხოლო საჭირო დროს სისტემა ავტომატიზებულ მანქანას ახალ დავალებას უგზავნის. ამის შემდეგ ტვირთი მომდევნო სამუშაო წერტილამდე გადაადგილდება. ამ გზით ტვირთის მოძრაობა წარმოების ტემპს მიჰყვება და შეფერხებების რისკიც მცირდება.

Cross docking სადისტრიბუციო ცენტრებში

სადისტრიბუციო ცენტრებში მსგავსი გადაზიდვა Cross docking პროცესის ნაწილია. Autopilot ტვირთს მიღების ზონიდან პირდაპირ გასაგზავნ სივრცეში გადააქვს, შუალედური დასაწყობების გარეშე. იქ პალეტები, როგორც წესი, იატაკზე მოწყობილ შესანახ ზოლებში თავსდება და გაგზავნას ელოდება.

ვრცლად პალეტების უჩანგლო ავტომატიზებული ტრანსპორტირების შესახებ >>

ცარიელი პალეტების გადაადგილება სხვადასხვა ზონას შორის

ცარიელი პალეტების გადაადგილება საჭიროა ყველა იმ სივრცეში, სადაც მასალების მარაგი ივსება ან მზა პროდუქცია მზადდება. ასეთი ადგილებია წარმოების ხაზები, შეგროვებისა და კომპლექტაციის ზონები, ასევე ნარჩენების დამუშავების სივრცეები.

როგორ გადაადგილდება ცარიელი პალეტები?

ცარიელი პალეტები ავტომატიზებულ ტექნიკას სამუშაო სადგურიდან შესანახ ზონაში სათითაოდ გადააქვს. საჭიროების შემთხვევაში, ტექნიკა მათ საპირისპირო მიმართულებითაც აბრუნებს და წარმოების ზონაში მიაქვს, სადაც პალეტებზე მზა პროდუქციას ათავსებენ. 

ავტომატიზებულ ტექნიკას შეუძლია ხელით დაწყობილი პალეტების მთელი შტაბელის გადატანაც. AGV მას საწარმოო ზონაში მოწყობილი იატაკის ბუფერიდან იღებს და ცარიელი პალეტების შესანახ სივრცეში გადააქვს. შედეგად, სამუშაო ზონაში ადგილი თავისუფლდება, პალეტები კი შემდგომი გამოყენებისთვის ერთ სივრცეში გროვდება.

როგორ იწყება ცარიელი პალეტების გადაადგილების პროცესი?

დავალება შეიძლება ავტომატურად გაიცეს დანადგარის PLC სისტემიდან ან საწყობის მართვის სისტემიდან, WMS-იდან. დავალების მექანიკურად გაცემაც შესაძლებელია. ამისთვის ოპერატორი T ONE პროგრამასთან დაკავშირებულ პლანშეტს ან სპეციალურ ღილაკს იყენებს.

სურათზე ნაჩვენებია ტვირთის აღებისა და განთავსების ტიპური ადგილები, იატაკის ბუფერი და ნარჩენების დამუშავების სადგური.

ვრცლად T ONE-ის შესახებ >>

როგორ გადადის მზა პროდუქცია გასაგზავნ ზონაში?

როდესაც პროდუქცია მზად არის, ავტომატიზებული ტექნიკა მას წარმოების ბოლო ეტაპიდან იღებს. ტვირთის აღების ადგილი შეიძლება იყოს კონვეიერი, საწარმოო ხაზი ან უშუალოდ დანადგართან მოწყობილი ზონა. თუ პროდუქციას შეფუთვა სჭირდება, Autopilot მას ჯერ შესაფუთ სადგურთან მიიტანს, შემდეგ კი გასაგზავნ ზონაში გადაიტანს.

სურათზე ნაჩვენებია ტვირთის აღების ტიპური ადგილები: კონვეიერი, საწარმოო დანადგარი და შესაფუთი დანადგარი.

ტვირთის დროებითი შენახვა

ზოგჯერ პალეტები პირდაპირ გასაგზავნ ზონაში თავსდება და სატვირთოში ჩატვირთვას იქ ელოდება. თუ პროდუქციის გარკვეული დროით შენახვაა საჭირო, ტვირთი სასაწყობე სივრცეში გადააქვთ.

ზოგ შემთხვევაში პროცესში რამდენიმე სახის ავტომატიზებული ტექნიკა მონაწილეობს. ერთი მანქანა ტვირთს საწყობის გარკვეულ წერტილამდე მიიტანს, იქიდან კი მის გადაადგილებას მეორე აგრძელებს. T ONE ამ ეტაპებს ერთმანეთთან აკავშირებს და თითოეულ დავალებას შესაბამის ტექნიკას ანაწილებს.

პარტიებად წარმოებული პროდუქცია გრავიტაციულ ან შატლის თაროებზე თავსდება, ხოლო ცალკეული პალეტები ჩვეულებრივ თაროებზე ინახება. თაროებისა და ტექნიკის ტიპი ტვირთის რაოდენობის, მოძრაობის სიხშირისა და შენახვის ვადის მიხედვით ირჩევა.

სურათზე ნაჩვენებია ტვირთის დროებითი შენახვის ტიპური ადგილები: ჩვეულებრივი და გრავიტაციული თაროები, ასევე RS150 შატლის სისტემა RAE რიჩ დამტვირთველთან ერთად.

როგორ იწყება ტვირთის გადატანის პროცესი?

ტვირთის გასაგზავნ ან სასაწყობე ზონაში გადატანის დავალება ხშირად ავტომატურად გაიცემა. მაგალითად, კონვეიერის ბოლოს დამონტაჟებული ფოტოსენსორი ან სკანერი ტვირთის მიახლოებას აფიქსირებს და სისტემას სიგნალს უგზავნის.

დავალება შეიძლება საწარმოო დანადგარის PLC სისტემიდანაც გაიცეს. საჭიროების შემთხვევაში, პროცესს ოპერატორი პლანშეტიდან იწყებს.

დანიშნულების ადგილს T ONE WMS სისტემიდან მიღებული ინფორმაციის მიხედვით არჩევს. თუ WMS არ გამოიყენება, პროგრამა დასკანერებულ მონაცემებს წინასწარ გაწერილ პირობებს ადარებს და ტვირთს შესაბამის ზონაში გზავნის.

სურათზე ნაჩვენებია ტვირთის განთავსების ტიპური ადგილი: იატაკზე მოწყობილი ბუფერული ზონა.

ვრცლად შატლის სისტემებით მუშაობის შესახებ >>

<< ავტომატიზებული სისტემების გვერდზე დაბრუნება